Negros, Occidental: 3 ka mag-utod nga lalaki, patay matapos na-suffocate sa ginakutkot nga buho; mag-utod, ginpahayag nga nagapangita sang bulawan

Negros, Occidental–Patay ang tatlo ka mag-utod nga lalaki sang na-suffocate sa idalum sang ginakutkot nga buho sa Sitio Bugtong, Brgy.  Tanawan, Kabankalan City.

Ginkilala ang mga biktima sanday Renante Nabas, 33-anyos; Rolando Nabas, 40-anyos kag Camelo Nabas, 42-anyos sang nasambit nga lugar. Nakaluwas naman ang ila manugbantay nga nga si Joseph Masola, 22-anyos.

Suno kay PSUPT German Garbosa sang Kabankalan City Police Station, ginpatihan sang mag-utod nga may natago nga bulawan sa amo nga lugar kabangdanan nagpasimpalad sila nga magkutkot sang buho. Naglab-ot sa 20 ka tapak ang buho nga ginkutkot sang mag-utod apang wala gid sang may nakita nga bulawan.

‘Daw Sulfur’

Nabalaka si Masola sang wala na sang may nagsabat sa iya pagpanawag halin sa ibabaw sang buho. Nagdesisyon ini nga magpanaug sa buho agud lantawon ang sitwasyon sang mag-utod sang nakapanimaho sang ginpahayag daw sulfur. Nagpin-ot ang dughan ni Masola kag naghingagaw ini nga magbalik sa ibabaw sa diin siya nalipong.

Ginpadal-an sang rescue team ang lugar kag ginkuha sa idalum ang tatlo ka mga biktima kag gindala sa ospital apang gindeklarar nga napatay. (Aine Grace Bravo)