Maglive-in Partner sa Jaro, Nadakpan sa Entrapment Operation
Iloilo City — Nadakpan sa entrapment operation sang mga otoridad sa Bitoon Jaro si Joe Ralph Logronio alyas Bilog, 30-anyos sang Licu-an Barotac Nuevo kag live-in partner sini nga si Janet Arcanio, 20-anyos sang Poblacion Banate.
Nakuhaan pa si Logronio sang isa ka fragmentation grenade kag isa ka sachet sang suspected shabu.
May narecover man nga duha ka motorsiklo lakip na ang ginapanag-iyahan ni PO2 Ryan Gayuma sang Jalaud Zarraga.
Una na nga gin-raid sang Anti-Carnapping Unit sang ICPO ang balay sang suspek sa Barotac Nuevo sa diin narecover ang 11 ka mga motorsiklo.
Nagapati si Supt. Alexander Rosales sang Anti-Carnapping Unit nga may kaupod si Logronio sa pagpangkawat sang motorsiklo.
Preso na sanday Logronio kag Arcanio sa karsel sang Jaro Police Station. (Nemesio Martirez)