1 patay, masobra 50 ka balay naabo sa duha ka magkasunod nga sunog sa syudad

Iloilo City–Masubo ang paskuwa sang 61 ka pamilya nga nadulaan sang balay sa sunog sa Zone 6 Boulevard, Molo kahapon.

Sa record sang City Social Welfare and Development Office ukon CSWDO, 44 ka mga balay ang totally-damaged kag 8 ang partially-damaged. Ginpahayag nga naghalin ang kalayo sa balay ni Willie Cordero bangud sa gin-alegar ginbayaan nga tinig-ang sang 11-anyos sini nga bata.

Wala gid sang may nasalbar nga kagamitan ang mga nasunugan bangud sang madasig nga paglaton sang kalayo sa mga pamalay nga lunsay human sa light materials. Naglawig sang masobra isa ka oras ang sunog antes napalong sang mga bombero.

Isa naman ang napatay sa sunog nga ginkilala kay Marissa Marba-is base sa kumpirmasyon ni Punong Barangay Jing Villanueva.

Sa pihak nga bahin, nasunog ang tatlo ka panalgan nga building sang Longwin Iloilo sa dalan Aldeguer, City Proper. Masobra duha ka oras nga naglawig ang pagpalong sang kalayo bangud sang mabaskog nga hangin. Magluwas pa ini sa mga naka-stock nga plastic ware kag RTWs nga yara sa sulod sang building.

Nagresponder man sa sunog ang mga firetruck sang nagkalain-lain nga kabanwahanan. Nagsugod ang kalayo sa ikaduha nga panalgan sang building kag madasig nga naglaton sa first kag third floor. Mga electronic items lang sa ground floor sang establisemento ang nasalbar sang mga empleyado. (Aine Grace Bravo)