3 ka sakay sang motorsiklo, patay sa pagpangluthang!

Lambunao, Iloilo–Patay ang tatlo ka sakay sang motorsiklo sang ginpangtiro sa Lambunao kaina sang kaagahon.

Suno kay SPO1 Edward Lesondra sang Lambunao Police Station, nagabiyahe ang mga biktima halin Passi City sang ginsundan sang tatlo ka mga suspetsado nga sakay sa ila tagsa ka motorsiklo kag gintiro pag-abot sa Barangay Pandan. Una nga naigo sa kamot ang naga-drive sang motorsiklo nga si Alex Acopio, 27-anyos, barangay treasurer sang Tranghawan.

Natumba ang motorsiklo rason nga napilpilan si Acopio kag duha sini ka angkas nga sanday Jasmin Navara kag Dioremae Losada, lunsay sang Poblacion Ilawod. Ginpalapitan ang mga ini sang mga suspetsado kag ginpangtiro sa ulo.

Nagapadayon ang imbestigasyon sang kapulisan sa motibo kag identity sang mga suspetsado. (Aine Grace Brav0)