3 lakip ang menor de edad, nadakpan sa buybust operation sa Smallville Complex
Mandurriao, Iloilo — Nadakpan sa buy bust operation ang tatlo ka lalaki nga ginalakipan sang menor de edad sa Smallville Complex, Brgy. San Rafael, Mandurriao ala 1 kaina sang kaagahon.
Ginkilala ang mga nadakpan kanday Marcos Philip Estiologo, 26-anyos; Lindoy Aristosa, 29 anyos kag alyas Laklak, 16 anyos, lunsay mga residente sang Brgy. Desamparados, Jaro.
Nakuha sa ila ang 18 ka sachets sang suspected shabu kag P1,600 pesos nga buy bust money.
Ginpanghiwala naman sang menor de edad nga involved siya sa pagbaligya sang illegal drugs. Gintudlo sang operating team si Laklak nga nagaserbe nga lookout antes sila nadakpan.
Ginakuwestyun naman sang mga operatiba halin sa Regional Drug Enforcement Unit kon ngaa nakasulod sa balay ilimnan si Laklak bisan menor-de-edad ini kag curfew hours pa. Suno sa mga operatiba, naghalin sa sulod sang bar ang tatlo antes naka-transaksyon sang poseur buyer kag nadakpan. (JoMaque)