Anti-Distracted Driving Act, nag-epekto na subong nga adlaw!

Iloilo City–Ginpahanumdom sang Land Transportation Office ang publiko nga nag-epekto subong nga adlaw ang Republic Act 10913 ukon ang Anti-Distracted Driving Act.

Nagakahulugan suno kay LTO 6 Assistant Regional Director Gaudioso Geduspan nga ginadumilian ang mga motorista sa pagamit sang cellphone ukon iban pa nga communication gadget samtang nagamaneho ukon nagapondo sa salakyan bangud sa red traffic light. Gintipon ni Geduspan ang ila mga law enforcers kag ginpahangup sang bag-o nga laye agud malikawan ang pagbinaisay sa mga motorista nga madakpan.

Ang madakpan pagabawian sang driver’s license kag isyuhan sang temporary operators permit. Pagamultahan ang mga violators sang P5, 000 sa first offense; P10, 000 sa second offense; P15, 000 kag suspension sang drivers license sang tubtob tatlo ka bulan sa third offense kag P20, 000 kag revocation sang drivers license sa fourth offense.

Exempted sa laye ang mga motorista nga maghimo sang emergency calls sa law enforcement agency, health care provider, fire department kag iban pa nga emergency services, agencies ukon entities. Exempted man ang mga naga-operate sang emergency vehicle pareho sang ambulansya, fire truck kag iban pa nga salakyan nga nagahatag sang emergency assistance samtang naga-duty.

Pasugtan naman ang driver sa pagamit sang cellphone nga may hands-free function. (AGB)

Archives, News, SlideshowGallery

Related posts

Leave a Comment