Asawa, amay kag utod sang suspek sa pagpatay sa dalagita sa Cabatuan, lakip sa mga kasuhan—IPPO Director

Iloilo — Ginkumpirmar ni Iloilo Police Provincial Office Director SSupt Marlon Tayaba nga gin-custody nila ang asawa ni Gringgo Morales nga si Arlyn pati na ang amay sang suspetsado.

Makabig suno sa iya nga accessories sa krimen ang apat bangud gintago nila ang suspetsado.

Natukiban sa pagpangusisa sang kapulisan nga sang Pebrero 13 sang gab-i, pagkatabu sang krimen, nabatian sang mga kasilingan sang biktima ang pagsinggit niya rason nga nagguluwa sila.

Lakip sa nagguwa suno kay Tayaba ang asawa. Nakita man sang asawa nga nagguwa sa balay sang biktima ang iya bana. Ang asawa pa ang nag-empake sang gamit sang bana kag nagpapalagyo.

SA CCTV footage nga kuha sa Barangay R. Armada sa Janiuay sa diin natumba ang motorsiklo ni Morales samtang nagapalagyo, makita nga may bitbit siya nga bag.

Gin-interview man sang Aksyon Radyo Iloilo si Arlyn sang Pebrero 15 kag consistent siya sa pahayag nga wala siya nakahibalo kun diin ang iya bana.

Sa hot pursuit operation sang mga pulis, ginpahayag ni Tayaba nga gintago sang pamilya si Morales.

Ang ginikanan pa suno kay Tayaba ang nagdala kay Morales sa Barangay Cahigon, Calinog sa diin siya ginkuha sang mga pulis kahapon, Pebrero 15.

Dugang ni Tayaba, ginpa-upod pa sang ginikanan ang utod ni Morales sang nagpadulong sa Cahigon.

Dal-un man sa kaso ang utod.

Gin-ako ni Morales ang krimen. Suno sa iya, kursunada niya ang biktima kag tuyo niya himuslan pero wala nadayon bangud nagsinggit.

Ginabanta sa 21 ang pilas sang dalagita pinakapatal sa iya tiyan kag puwak nga ginlaslas sang suspek. (AGB/MO)