Association of Taxi operators in Panay (ATOP), ginaduso ang Wholistic Approach agud makalikaw sa hold-up ang mga taxi driver!

Iloilo City — Ginaduso sang Association of Taxi Operators in Panay (ATOP) ang wholistic approach agud makalikaw sa hold-up ang mga taxi drivers ilabe na ang mga nagabiyahe kon gab-i kag nagadul-ong sang pasahero sa guwa sang syudad.

Suno kay ATOP president Perfecto Yap, indi lang paglog-in kag paglog-out ang ila ginaduso sa mga taxi drivers.

Madamo pa suno sa iya sang procedures nga ila gina-determinar pareho ang pagbutang sang alarm sa salakyan nga mahimo matum-ok sang driver kon ginahold-up ini.

Ginakonsiderar man ang pagradyo sang taxi driver sa mga pulis kon maguwa ini sa syudad.

Apang mas maayo gid suno kay Yap nga visible ang mga pulis agud mahadluk ang mga kriminal.

Natalana buwas ang una nga hugnat sang hearing ni ex-officio City Councilor Reyland Hervias tuhoy sa ginaproponer nga log-in, log-out scheme sa mga taxi drivers.

Sang nagligad nga binulan, sunod-sunod nga pagpanghold-up sa mga taxi drivers ang natabu sa diin may isa nga napatay kag nabulag ang isa ka mata sang isa pa ka driver. (JoMaque)