Association of Taxi Operators in Panay, mapabitbit sa ila taxi units sang kopya sang Speed Limit Ordinance sang syudad agud malikawan ang pagbaisay

Iloilo City–I-require sang Association of Taxi Operators in Panay ukon ATOP ang ila mga miembro nga magdala sang kopya sang Speed Limit Ordinance sang syudad.

Suno kay ATOP President Perfecto Yap, katuyuan sini nga malikawan ang pagbaisay sang ila drivers kag mga pasahero. Gin-ako ni Yap nga may mga pasahero nga nagareklamo bangud mahinay ang dalagan sang taxi.

Maayo suno kay Yap kon may kopya sang ordinansa ang mga drivers agud makarason sila sa pasahero nga nagasunod sila sang ordinansa.

Una na ginpabutyag ni Yap nga kulang ang information dissemination sang syudad sa gina-implementar nga ordinansa nga una ginpatuman sa Diversion Road. Matuod suno sa iya nga may mga signage nga ginbutang apang alang-alang man ang ginplastaran pareho sang idalum sang Infante flyover. (AGB)