Bangkay ni anay Governor Niel Tupas, gindala na sa iya hometown sa Barotac Viejo

Iloilo — (UPDATE)  Yara na sa Barotac Viejo ang bangkay ni anay Governor Niel Tupas matapos ginsaylo halin sa iya balay sa MV Hechanova, Jaro.

Ginpahayag sang iya kamagulangan nga bata nga si 5th District Congressman Niel Tupas, Jr. nga bukas sa tanan ang paglantaw sa bangkay sang iya amay samtang ginahamyang sa hometown sini sa Barotac Viejo.

Igalubong ang anay gobernador sa Sabado, Disyembre 5 sa Barotac Viejo Municipal Cemetery pagkatapos sang alas 8 sa aga nga misa sa St. Peter and Paul Parish Church.

May eulogy man ang kaabyanan ni anay Governor Tupas sa Disyembre 4.

Napatay ang anay gobernador sang Nobyembre 24 sang kaagahon sa edad nga 82 sa Philippine Heart Center bangud sa multiple organ failure.

Sang nag-abot ang bangkay sini sa Iloilo sang Nobyembre 27, una ini nga ginhamyang sa lobby sang Provincial Capitol antes gindala sa ila balay sa MV Hechanova, Jaro.

Si anay Governor Tupas ang nangin alkalde sa Barotac Viejo sang 1972 tubtub 1978; Congressman sa Quinto distrito sang 1987 tubtub 1998 kag gobernador sang 2001 tubtub 2010. (JoMaque)