Bayan Panay, Pabor sa Unilateral Ceasefire nga Gindeklarar ni Presidente Rodrigo Duterte sa iya SONA

Iloilo City–Positibo ang pagbaton sang Bayan Panay sa pahayag ni Presidente Rodrigo Duterte sa iya State of the Nation Address (SONA) nga nagadeklarar sang unilateral ceasefire sa mga communist groups.

Suno kay Bayan Panay Spokesperson Elmer Forro, nagapakita lang ini nga seryoso si Duterte nga magnegosyar sa Communist Party of the Philippines-New People’s Army-National Democratic Front. Nagapati man ini sa sinsiridad sang Duterte administration nga malab-ut ang kalinungan sa pungsod.

Sa iya nga SONA, ginhambalan ni Duterte ang mga miembro sang CPP-NPA-NDF nga indi dapat magpatyanay ang mga pareho nga Filipino.

Ginpabutyag naman ni Forro nga bisan wala namitlang ni Duterte sa iya SONA ang pangalan sang mga local executives nga ginapatihan protector sang illegal drugs, wala ini nagbuhin sa iya kaseryoso sa away kontra illegal nga druga. (AGB)