Bike lane nga ginbutang sa pila ka dalanon sa syudad, wala sang koordinasyon sa PSTMO

Iloilo City  — Wala sang koordinasyon sa Public Safety and Transportation Management Office ang bike lane nga ginbutang sa pila ka dalanon sa syudad.   Gintumod ni PSTMO Head Jeck Conlu ang ginpinta nga green sa karsada. Natalupangdan ini ni Conlu gani nagpakig-angut siya sa City Council. Ginpabutyag suno sa iya ni Councilor Jay Treñas nga programa sang national government ang pagbutang sang bike lane. Wala pa sang nakita si Conlu nga ordinansa sa syudad nga magadesignar sang mga lugar para sa bike lane. Magapakigsapol si Conlu sang coordination meeting upod sa Department of Public Works and Highways kag City Council agud mausisa ang programa. Ginkonfirmar naman ni Engr. Rodney Gustilo sang DPWH City District Engineering Office nga proyekto nila ang bike lane. Kon maplastar na ang tanan, dumilian ang paglabay sang iban nga salakyan magluwas lang sa bisikleta sa ginatumod nga lane.

“Wala sang pulos”

Mangin wala sang pulos ang bike lane nga ginplastar sa pila ka dalanon sa syudad kon indi ensakto ang pagpatuman sang mga traffic ordinances. Reaction ini ni Iloilo City Loop Alliance of Jeepney Owners and Drivers Association ukon ICLAJODA President Raymundo “Boyet” Parcon, kasunod sang ginpinta nga green sa karsada. Suno kay Parcon, dapat talupangdon sang syudad ang mga nagalapas sa traffic ordinances bangud nagadugang sila sa pagutok sang trapiko. Una na nga ginpabutyag ni Public Safety and Transportation Management Office Head Jeck Conlu nga wala sang koordinasyon sa iya opisina ang pagbutang sang bike lane. Nahibal-an man sini nga programa ang bike lane sang national government. (JoMaque)

Archives, Gallery, News,

Related posts

Leave a Comment