Calinog Mayor Alex Centena, may reaksyon sa report nga may armed groups sa iya banwa

Calinog, Iloilo–Wala sang ideya si Calinog Mayor Alex Centena nga may presensya sang armed groups ukon goons sa iya banwa.

Sa pagkahibalo sang alkalde, mga miembro lang sang New Peoples Army ukon NPA ang naga-egsister sa iya banwa nga makita sa boundary sang Tapaz, Antique kag Libacao, Aklan. Base sa intelligence report nga nakalab-ut kay Centena, wala sang civilian armed groups sa banwa nga involved sa illegal drugs, robbery, kidnapping, abduction kag gina-hire sang mga politiko kon eleksyon.

Wala naman sang plano si Centena nga makigkita kay IPPO Director PSSUPT Marlon Tayaba agud athagon ang report nga nalakip sa pito ka banwa sa probinsya ang Calinog nga may presensya sang armed groups. Apang handa siya nga magkooperar sa kapulisan kun hatagan siya sang kopya sang report kag kun si Tayaba na ang mag-istorya sa iya.

Magluwas sa Calinog, may presensya man sang armed groups sa Sara, Lemery, San Rafael, Estancia, San Enrique kag Pototan suno kay Tayaba. (AGB)