Councilor Joshua Alim, nagaproponer nga idumili ang pagbaligya sang makahulubog nga ilimnon paglapaw sang ala-1 sa kaagahon

Iloilo City–Ginproponer ni Councilor Joshua Alim sa City Council ang pagdumili sa pagbaligya sang makahulubog nga ilimnon halin ala-1 sa kaagahon tubtob alas-8 sa aga.

Suno kay Alim, indi lang Smallville Complex sa Mandurriao ang sakup sang iya proposed ordinance kundi bilog nga syudad. Ginpahayag sang konsehal nga pila ka barangay officials ang nakatalupangod nga may naga-inom pa sa higad sang dalan kag sa mga tyangge kon kaagahon gani nakulbaan maglabay ang mga residente nga kaagahon na nagapauli.

Ilakip man ni Alim sa proposed ordinance ang pagpapanaug sang penalidad sa nagabaligya kag nagabakal sang makahulubog nga ilimnon kon madakpan sa amu nga oras.

Ginapa-abot na ni Alim nga magapamatok sa iya proposal ang mga establisemento nga nagabaligya sang ilimnon gani luyag niya pamatian ang ila mga sentimiento kon marefer sa Committee on Police Matters ang iya proposed ordinance. Gin-athag ni Alim nga katuyuan sang iya proposal nga malikawan ang anuman nga mga insidente sa syudad sa disoras sang gab-i tubtub sa kaagahon. (AGB)

Archives, News, SlideshowGallery

Related posts

Leave a Comment