DFA, nagpasalig nga sabton ang gasto sa pagpabalik sa pungsod sang bangkay sang Ilongga nga nasapwan sa freezer sa Kuwait

Iloilo City — Sabton sang Department of Foreign Affairs ang gasto sa pagpabalik sang bangkay sang Ilongga OFW nga nasapwan sa sulod sang freezer sa abandonado nga apartment sa Kuwait.   Suno naman kay Anita Saldo, Officer-in-Charge sang DFA-Iloilo, aprubado na ang budget sa idalum sang Office of the Undersecretary for Migrant and Workers Affairs ukon UMWA para sa shipment sang bangkay ni Joanna Demafelis sang Ferraris, Sara.  Handa suno sa iya magbulig ang DFA-Iloilo bisan undocumented worker ang pagkabig kay Demafelis bangud May 2016 pa nag-expire ang iya nga kontrata.

Nagpadulong kahapon sa DFA ang amay ni Demafelis nga si Crisanto kag nagpirma sang acceptance of human remains.  Suno kay Mr. John Fajardo, Assistance National Officer sang DFA 6, gilayon nga ginpadala ang dokumento sa UMWA agud maproseso gilayon ang pagpauli sang bangkay sang Ilongga.

Bulig para sa pamilya

Ginaproseso na sang Overseas Workers Welfare Administration ukon OWWA ang tanan nga dokumento agud mahatagan sang assistance ang pamilya ni Joanna Demafelis, ang OFW nga tumandok sa Sara, Iloilo, nga nasapwan sa sulod sang freezer sa Kuwait.

Suno kay Mr. Jack Arroyo, case investigator sang OWWA 6, ginahulat nila ang resulta sang final investigation sang Philippine Embassy sa Kuwait kon san-o gid napatay si Joanna.

Sa record sang OWWA, may duha ka tuig nga kontrata sa Kuwait bilang OFW si Joanna Daniela Demafelis halin May 18, 2014 tubtob May 18, 2016 sa Our Lady of Mount Carmel E-Human Resources nga nahamtang sa M.R.S. Building Mabini Street, Ermita, Manila. (JoMaque)