Dinagyang Update: Dinagyang Food Festival, magasugod karon sa gab-i!

Iloilo City–Magasugod na ang Dinagyang Food Festival karon sa gab-i sa pagpanguna sang Iloilo Hotels, Resorts and Restaurants Association (IHRRA).

Ginpahayag nga 35 ka miembro sang IHRRA ang magapresentar sang pinakamanamit nga Ilonggo dishes kag iban pa nga Filipino nga pagkaun sa food festival. Magluwas sa pagkaun, magalingaw man sa mga Ilonggo ang live band music.

Samtang sa food festival, pagadumilian sang Iloilo City Police Office ang pagserbi sang mga makahulubog nga ilimnon sa botelya, pagkaon nga nagagamit sang barbecue stick kag mga bladed weapons. Suno kay ICPO Spokesperson Inspector Shella Mae Sangrines, lakip nga i-kumpiskar ang mga buckle knife. Daku ang posibilidad nga magamit sa gamo sang hubog nga customer ang barbecue stick ukon bottled drink kon indi pagdumilian sa food festival.

Himuon man sang ICPO nga no smoking area ang food festival. (Aine Grace Bravo)