Duha ka jeepney association sa Mandurriao sa idalum sang ICAJODA, naginamo bangud sa problema sa duty sang ila mga dispatcher

Iloilo City — Dapat nga magpatunga si Councilor R Leone Gerochi, chairman sang Committee on Transportation sa City Council sa tensyon sang duha ka jeepney association sa Mandurriao.

Suno kay Mandurriao Operators and Drivers Association (MODA) president Eduardo Gimong, wala sila nagpasugot sa luyag ni Mandurriao Integrated Jeepney Operators (MIJODA) president Freddie Gabonas nga dispatcher sang MIJODA ang magapasaka sang mga pasahero sa jeep nga naga-parking sa Barangay Oñate kon Lunes, Mierkules kag Biernes samtang Martes, Huwebes kag Sabado ang ihatag sa MODA.

Mabudlay intiendihon si Gabonas suno kay Gimong bangud luyag sini nga magahum sa pagsulundan sa pagpasaka sang pasahero bisan pa nga ang MODA ang accredited nga asosasyon sang Securities and Exchange Commission (SEC).

Natabu ang gamo sa tunga nanday Gimong kag Gabonas sang napierde sa eleksyon sang Enero 20, 2013 si Gabonas apang ginpahayag nagpamalibad ini nga magpanaug sa puwesto. (JoMaque)