Gov. Arthur Defensor, nagbalibad sa pagbuyagyag sang kaundan sang closed-door conference sini kaupod ang pamilya Garin

Iloilo—Naglawig sang masobra isa ka oras ang closed-door conference ni Governor Arthur Defensor sa pamilya Garin sa iya opisina sa Provincial Capitol kahapon.

Full-force ang pamilya Garin sang nag-abot sa opisina sang gobernador nga ginalakipan nanday former Congressman Oscar Garin, 1^st District of Iloilo Congressman Richard Garin, Board Member Ninfa Garin kag Guimbal Mayor Christine Garin. Nakita nga seryoso si former Congressman Garin sang naguwa sa opisina ni Defensor.

Nagbalibad naman si Defensor nga magbuyagyag sang kaundan sang meeting samtang naglikaw ang anay kongresista sang ginpamangkot kon may kahilabtanan sa pulitika ang ila sinapol sang gobernador. Sa baylo, ginrason sini nga parte lang sa pagpanguma kag pagsagod sang kasapatan ang ila gin-istoryahan bangud hilig ini ni Defensor.

Una na ginpabutyag sang anay kongresista nga available siya magkandidato para sa pagka-bise gobernador sa 2016 elections. (Aine Grace Bravo)