Hepe sang Mandurriao Police Station, nagaduda sa ginsugid sang nadakpan nga gina-angut kay the late PDEA identified drug group leader Melvin Odicta

Iloilo City–Wala ginapatihani Chief Inspector Juvy Navales ang mga impormasyon nga ginasugid sang nadakpan nga wanted person nga si Michael Jancilan.

Duda si Navales sa ginsugid ni Jancilan nga may plano ini nga magsurrender antes siya na-aresto sa kaso nga illegal possession of firearms sa bulaluhan sa Brgy San Rafael kahapon. Suno kay Navales, madanlog nga tawo si Jancilan kag nagasaylo-saylo ini sang lugar agud indi mahibaluan ang iya lokasyon.

Wala man ginadula ni Navales ang posibilidad nga may koneksyon pa si Jancilan sa grupo sini sa Iloilo bangud indi ini magpanago sa lain-lain nga lugar kon wala sang kuwarta. Usisaon ni Navales sa korte kon anu pa ang mga kaso nga gin-file batuk kay Jancilan kag iban pa sini nga police records.

Base sa record sang Iloilo Police Provincial Office suno kay IPPO Spokesperson Ronnie Brillo, nakatrabaho si Jancilan nga car wash boy sa Melvin Taxi Company ni the late PDEA identified drug group leader Melvin Odicta. Isa siya sa suspek sa pagpatay kay SPO2 Rex Delos Reyes sang 2014 apang ginrelease sang 2016. Setyembre, 2017 naman sang nakapalagyo siya sa entrapment operation sang Iloilo Police Provincial Office kag Criminal Investigation and Detection Group sa Jelicuon, Cabatuan. (AGB)