ICLAJODA, nagprotesta sa atubang sang LTFRB 6 Office agud ipalab-ot sa ahensya ang ila concerns

Iloilo City — Nagprotesta sa atubang sang opisina sang Land Transportation Franchising and Regulatory Board ukon LTFRB 6 kaina sang aga ang mga miembro sang Iloilo City Loop Alliance of Jeepney Owners and Drivers Association ukon ICLAJODA.

Suno kay ICLAJODA Secretary-General Andrea Golez, 5 ka mga concerns ang ginpalab-ot sang grupo nga mahatagan sang igtalupangod ni LTFRB 6 Director Josette Abellar.

Ini amu ang dugang nga 50 sentimos sa plete sang mga depasahero nga jeep sa syudad; pagpa-untat sang Joint Administrative Order ukon JAO bangud sang daku nga penalidad; plano nga pag-phase out sa mga PUJ’s nga naga-edad sang 15 anyos pasaka; ang madamu nga requirements sa pag-proseso sa LTFRB kag ang pagkuha sang special permit nga may dugang nga balayran kag ginapangayo nga affidavits.

Sang biernes, naghiwat sang forum ang LTFRB kaupod ang ICLAJODA apang wala sang nalab-ot nga solusyon kag rekomendasyon ang pamunuan sang ahensya gani ginpakamaayo sang transport group nga magprotesta.

Kaupod man nga nag-protesta kaina ang mga provincial jeepney owners and drivers, piston-panay kag partido ng manggagawa. (JoMaque)