Igabulos kay TMTRO OIC Donna Acap, posible mahibaluan sa masunod nga semana

Iloilo City–Posible nga mahibaluan sa masunod nga semana kon sin-o ang ipahamtang ni Mayor Jed Patrick Mabilog nga officer-in-charge sa Transportation Management and Traffic Regulation Office TMTRO tal-os kay Donna Acap.

Pahayag ini ni Atty. Mark Piad, spokesman kag legal counsel ni Mabilog, matapos nagpadala sang sulat sa Comelec regional office ang Human Resource Department sang City Hall. Suno kay Piad, hulaton ni Mabilog ang desisyon sang Comelec sa ginahingyo nga exemption para sa pag-appoint sang bag-o nga TMTRO OIC.

May ginapa-comply lang suno sa iya ang Comelec nga mga documentary requirements sa City Government base sa mga Comelec resolutions.

Pabor ang mga transport groups nga ilisan si Acap sa TMTRO kag magpangita sang mas may ikasarang nga magsolbar sang problema sa trapiko sa syudad. (Aine Grace Bravo)