Iloilo City Lone District Cong. Jerry Treñas, ginpasakaan sang kaso nga graft sa Sandiganbayan

Manila — Ginpasakaan sang Ombudsman sang kaso nga graft sa Sandiganbayan si Iloilo City Lone District Congressman Jerry Treñas. Ang kaso may kaangtanan sa gina-alegar ma-anomaliya nga pagpaguwa sang pondo ni Treñas sadtong alkalde pa ini, para sa Iloilo Press Club. Suno sa  Ombudsman, halin Disyembre 2003 tubtob Enero 2004, nagpaguwa si Treñas sang pondo nga nagalab-ot sa P500,000 para sa pagtukod sang Iloilo Press Club ukon IPC office sa Barangay San Pedro, Molo. Ginpahayag sang Ombudsman nga wala dapat nagsulod sa nasambit nga proyekto ang kongresista bangud ang IPC indi man non-government organization nga accredited sang syudad. Suno pa sa Ombudsman nga naglapas ang kongresista sa pagsulundan sang Commission on Audit ukon COA bangud wala sini namonitor ang proyekto. Tubtob subong, suno sa Ombudsman nagapabilin nga unaccounted ang proyekto bangud sang kakulangan sang mga dokumento kag status report. P30,000 ang ginrekomendar piyansa para sa kahilwayan ni Treñas. (JoMaque)