Isa patay, Isa pilason sa magkatuhay nga insidente sang pagpamuno sa Calinog

Calinog, Iloilo — Isa patay isa pilason sa magkatuhay nga insidente sang pagpamuno sa Calinog sang weekend sa selebrasyon sang ila kafiestahan.

Suno kay Senior Inspector Kennith Bermejo, hepe sang Calinog Municipal Police Station, una nga nagluntad ang insidente sa Barangay Aglibacao. Gindala pa sa ospital suno kay Bermejo si Alfie Cabayao,31-anyos sang Barangay Badu, Calinog apang napatay bangud sang pilas sa tiyan kag wala nga kamot.

Sa imbestigasyon sang pulis, una nga mga suspetsado sanday Jomar Casiple,20-anyos kag Jenil Castor,24-anyos, residente sang Barangay Aglibacao apang nagpahayag ang biktima antes napatay nga si Castor ang nagbuno sa iya. Ginpahayag gilayon naman nga nagpalagyo si Castor. Daan nga hilikutanon ang gintunaan sang insidente suno kay Bermejo.

Samtang, estable naman ang kondisyon ni Agustin Carumba,54-anyos sang Barangay San Nicholas, Calinog matapos ginpahayag nga ginbuno ni Rodolfo Alcarte,53-anyos sa Barangay Cabagiao sang nasambit nga banwa.

May pilas sa tiyan si Carumba suno kay Bermejo samtang arestado naman ang suspetsado. Hinubog ang gintunaan sang insidente sa imbestigasyon sang Calinog police. (JoMaque)