Isa sa Tatlo ka IPPO Police Officials nga Ginrelieve sang PNP National Headquarters, Nagalibog ang Ulo sang Pagsaylo sa Iya sa Camp Crame

Iloilo–Nagalibog ang ulo ni PSI John Ryan Doceo, anay hepe sang Provincial Anti-Illegal Drug Special Operations Team (PAIDSOT) kasunod sang pagkaulamid sang iya pangalan sa mga police officials kag police non-commissioned officers sa Western Visayas nga ginrelieve sang Camp Crame.

Suno kay Doceo, wala gid siya nakahibalo sang rason kon ngaa ginrelieve siya kag gin-reassign sa Personnel Holding and Accounting Unit (PHAU) sa PNP National Headquarters sa Camp Crame.

Ginpa-athag ni Doceo nga consistent man siya sa kampanya kontra sa illegal nga druga halin sang 2013. Ginbida man sini ang nabaton nga mga awards kag recognition sa regional kag national level bilang pamatuod nga maayo ang iya performance.

Ginpabutyag naman ni Doceo nga matinlo ang iya konsensya bisan pa sang mga duda nga may kaangtanan sa illegal drugs ang relief order.

Magluwas kay Doceo, ginrelieve man sanday PSUPT Richard Adonis Habawel nga anay company commander sang IPPO, PSI Ariel Corcino, anay hepe sang Pototan Police Station kag PCI Lorenez Losaria kag lima ka PNCOs. (AGB)