Japanese National nga Ginapatihan tuyo nga Holdapon sa Sta Barbara, Natiruhan sang Suspek

Iloilo — Nakibyasan sa ulo ang japanese national nga natiruhan sa Barangay Café, Sta Barbara kagab-i.

Ginkilala ang biktima kay Hiroyoshi Akimoto, 68 anyos kag 15 ka tuig nga naga-istar sa Barangay Café.

Base sa panaysayon sang biktima, ginapapuno niya ang tangke sang tubig sa likod sang ila balay sang ginpalapitan sang suspek nga nagpanaug halin sa tricycle.

Gintabunan sang suspek ang baba ni akimoto pero nagbato ini tubtob nga naglupok ang single shot nga pugakang kag naigo sa agtang ang hapones.

Nagpalagyo naman ang suspek kaupod ang isa pa sang naguwa sa balay ang mga kaupod ni Akimoto.

Nagapati si PO1 John Sabio sang Sta Barbara Police Station nga tuyo nga holdapon ang biktima.

Wala man suno sa pulis sang kaaway sa barangay si Akimoto nga kilala nga maalwan kag mabuot.

Ginlaragway ni Akimoto ang suspek nga nagpalapit sa iya nga ginabanta 5’4 ang kataason, mabukod ang lawas kag naga-edad sang 20 tubtob 25 anyos. (JoMaque)