Komitiba ni City Councilor R. Leone Gerochi, naghatag sang deadline sa PECO agud magsumiter sang counter proposal sa pagproteher sa ila mga konsumedor

Iloilo City–Gintalana sang Committee on Public Utilities sa City Council nga ginapamunuan ni Councilor R. Leone Gerochi sa Marso 27 ang deadline sa pagpasa sang counter proposal sang Panay Electric Company agud maproteksyunan ang mga kunsumedor batok sa sala nga billing.

Ini ang nakasugtan suno kay Gerochi kasunod sang public hearing kahapon sa diin gin-imbitar ang mga tiglawas sang PECO.

May inisyal na nga proposal nga ginpresentar ang PECO kahapon suno kay Gerochi kasubong sang smart metering program. Sa sini nga paagi, ang mga kunsumedor, butangan sang smart meter kag ang reading sa ila nakonsumo nga elektrisidad mahimo makita online. May yara man ginpresentar nga prepaid electric meter ang PECO nga indi na kinahanglan sang kuntador. Isa pa dire suno kay Gerochi ang pagbutang sang reading sa mga nakaligad nga bulan sa billing para makita gid sang mga kunsumedor.

Pero ang isa sa nakit-an ni Gerochi nga immediate solution sa problema amo ang pagkakas sang mga frontliners sang PECO. Ginpa-athag sang konsehal nga sala sang PECO ang natabu sa billing nga nagpa-alsa sa mga kunsumedor kag dapat kuntani suno sa iya nga makahibalo mag-amoma ang mga empleyado sang PECO nga naga-atubang sa mga nagareklamo. (AGB)

Archives, News, SlideshowGallery

Related posts

Leave a Comment