Lalaki nga Madugay na Nagapangawat sang Bugas sa Grocery store sa Concepcion, Nadakpan

Concepcion, Iloilo — Natukiban ang pagpangawat sang sinaku sang bugas sa grocery store sa Poblacion Concepcion.

Ginkilala ang arestado kay Herni Arvis sang Antonio Yusay Saya.

Suno kay Chief Inspector Jonathan Pinuela, hepe sang Concepcion Police Station, ulihi na lang natalupangdan ni Rosella Demate nga kulang ang stocks sa iya baligyaan.

Natukiban nga tag-tatlo ka saku ang ginakawat ni Arvis sa kada delivery.

Suno kay pinuela, gina-stock ni Arvis ang ginkawat nga sinaku sang bugas sa ginarentahan sini nga tindahan sa kilid sang grocery store ni Demate.

Preso na si Arvis sa karsel sang Concepcion Police Station kag natalana kasuhan. (JoMaque)