Maasin, gindeklarar na nga drug free municipality

Maasin, Iloilo–Gindeklarar nga drug free municipality ang Maasin paagi sa programa kaina sang hapon. Suno kay Mayor Mariano Malones, base sa  pagvalidate sang oversight committe, wala na sang presensya sang illegal nga druga sa mga drug affected nga barangay sandig man sa report nga ginsumiter sang Barangay Anti-Drug Abuse Councils ukon BADAC.

Dugang niya, ginpa-idalum sa drug test ang mga tokhang surrenderers lakip ang mga barangay officials kag tanods apang wala sang may ginrekomenda nga magpa-drug rehab.

Ginpa-athag naman ni Malones nga bisan bag-o lang pungko nga hepe sang Maasin Police Station si PINSP Romwill Miras, nagpirma siya sa pagdeklarar sa banwa nga drug free bangud may mga reports na ang anay hepe tuhoy sa drug situation sa banwa.

Bugal suno kay Malones ang pagdeklarar sa ila nga drug free apang daku nga paghangkat ang pagmentinar sa banwa nga drug free. Si Malones upod sa iya vice mayor nga si Francis Amboy ang nalakip sa narco list ni Presidente Rodrigo Duterte nga iya ginlawag sang nagligad nga tuig. (AGB)