Maestro, desidido magpasaka sang kaso batuk sa naghold-up sa iya

Iloilo City–Desidido ang 40-anyos nga maestro nga magpasaka sang kaso batuk sa apat ka nagholdap sa iya kagab-i.

Suno kay Judy Fabular sang San Isidro, Jaro kag clinic teacher sang Iloilo Central Elementary School, makadto kuntani siya sa Red Cross agud magkuha sang dugo para sa iya hinablos nga na-ospital sang ginhold-up sang mga suspek sa likod sang Provincial Capitol. Ginpahayag ni Fabular nga gintayaan siya sang barbecue stick kag ginpangayuan sang 20 pesos pero ginhambalan niya ang suspek nga duha ka pesos lang ang iya kwarta. Ginhatag sini ang kwarta pero ginhaboy sang suspek kag gin-ukay pa ang iya bag. Nakatiempo si Fabular nga makuha ang iya perfume kag gin-spray sa mata sang suspek gani nakadalagan siya.

Nakapalagyo ang mga suspek pero nadakpan si Relizalde Vingno, 38-anyos sang North Baluarte, Molo, nga ginpahayag nagserbe nga lookout. (AGB)