Mandu ni Alimodian Mayor Kalay Alonsabe nga patyon ang mga durugista, dapat magserbe nga paandam sa mga drug personalities suno sa alkalde

Iloilo — Magaserbe nga paandam sa mga durugista nga luyag liwat magsulod sa Alimodian ang mandu ni Mayor Geefre “Kalay” Alonsabe sa iya mga pulis nga patyon ang mga drug personalities.  Suno kay alonsabe, luyag niya lang mamentinar sang local government unit ang pagdeklarar sa 51 ka barangay sa banwa nga drug cleared. Kanugon suno sa alkalde sang deklarasyon kon magbalik ang illegal drug operation sa banwa. Ginhangkat man ni Alonsabe ang mga barangay officials nga mag-aligmat agud masiguro nga indi madagtaan ang ila mga constituents ilabe na ang mga kabataan nga pala-abuton sang Alimodian.  Gin-athag naman ni Alonsabe nga maga-react lang ang mga pulis KON magbato ang ma-identify nga drug personality. May matigdas naman nga mensahe ni Alonsabe sa mga human rights activists nga nag-react sa iya mandu. Suno sa alkalde, may kinamatarung ang LGU nga proteheran ang mga pumuluyo batuk sa luyag maguba sa ila pareho sang mga involved sa illegal drugs. Maisog man nga ginhambal ni alonsabe nga wala siya mahadluk mapatay bangud sa pagpakigbato kontra sa illegal drugs. (JoMaque)