Mayor Jed Patrick Mabilog, ginpasakaan sang kaso nga graft ni Councilor Plaridel Nava sa Ombudsman

Iloilo City–Ginpasakaan ni Councilor Plaridel Nava sang kaso nga graft sa Office of the Ombudsman Visayas si Mayor Jed Patrick Mabilog kahapon.

Sa iya affidavit, gin-alegar ni Nava nga si Mayor Mabilog ang nagapanag-iya sang 3L Towing Services, ang kompaniya nga ginkuha sang syudad agud mag-operate sang gin-implementar ang Reg. Ord. No. 2014-191–An Ordinance Incorporating the Use of Wheel Clamp by Way of Supplement to Regulation Ordinance No. 2013-318 (Towing Ordinance of the City of Iloilo). Gin-isa-isa man ni Nava sa iya affidavit ang pagkakilala sini sa alkalde kag naghatag sang supplemental affidavit sa ginfile nga kaso sang journalist nga si Manuel Mejorada batuk kay Mabilog may kaangtanan sa 3L.

Gin-alegar ni Nava nga ginsugo siya ni Mabilog nga magpangita sang kompaniya agud mangin dummy sa pagpang-clamp gani gin-istorya sang konsehal si Leny Garcia, ang nagpakilala nga tag-iya sang 3L Towing. Hunyo 2014 naman suno kay Nava sang ginhatagan siya sang alkalde sang P500, 000 nga cash agud maproseso na ang pag-operate sang 3L. Sa interview sang Aksyon Radyo, gin-alegar ni Garcia nga nabaton sini ang kwarta. Suno sa iya, kumpiyansa siya sang nagsulod sa joint venture bangud ginpasalig siya ni Nava kag nagapati nga si Mayor Mabilog ang iya partner.

Sa iya naman nga Facebook page, ginpanghiwala ni Mayor Mabilog ang akusasyon ni Nava. Ginpa-athag sang alkalde nga nagdesisyon siya nga indi pagdayunon ang pagkuha sa serbisyo sang 3L agud proteheran ang interest sang mga Ilonggo. (Aine Grace Bravo)