Mayor Jed Patrick Mabilog, mahimo maka-leave sang indi magsobra sa isa ka tuig kun aprubahan sang DILG Secretary

Iloilo City — Mahimo maka-leave si Mayor Jed Patrick Mabilog sang masobra isa ka tuig. Apang nakadepende sa secretary sang Department of Interior and Local Government (DILG) kun aprubahan ang leave of absence. Suno kay City DILG Director Atty. Ferdinand Panes, magluwas sa vacation leave nga 15 days kag sick leave nga 15 days kada tuig, mahimo maka-file sang leave of absence nga indi magsobra sa isa ka tuig ang alkalde. Mahimo ini nga maaprubahan sang DILG apang indi dapat masakripisyo ang public service. Gin-athag man ni Panes nga wala sang indefinite leave bangud kinahanglan nga i-specify ang petsa sang pag-leave.

Ang paathag ginhimo ni Panes bangud wala pa nakabalik sa syudad si Mayor Mabilog halin sa official travel sini sa Japan kag Malaysia bisan natapos na sang Setyembre 9 ang iya official travel authority. Ini man ang rason kun ngaa nagapabilin nga acting mayor si Vice Mayor Joe Espinosa III. (JoMaque)