Mga konsumedor sang PECO nga may reklamo sa over billing, nagtambung sa committee hearing may kaangtanan sa proposed ordinance ni Councilor Joshua Alim nga pagamit sang meter reading card system

Iloilo City–Nagsulong ang mga konsumedor sang panay electric company nga may reklamo sa over billing sa public hearing sang Committee on Public Utilities nga ginapamunuan ni Councilor R. Leone Gerochi.

May kaangtanan ini sa proposed ordinance ni Councilor Joshua Alim nga maga-require sa PECO sa pagamit sang meter-reading card system agud maproteheran ang mga konsumedor sa erroneous biling. Ginabanta 20 ka konsumedor ang nag-abot sa venue sang hearing sa City Hall kag nagpa-utwas sang gulpi nga pagsaka sa ila balayran sa PECO.

Nagpresentar naman si Engr. Randy Pastolero, Vice President for Operations sang PECO, sang alternative proposal sa meter reading card system.

Ginduso sang PECO para sa immediate ukon short term solutions ang:

• paghatag sang long-term payment plan para sa na- accumulate nga bills;
• gilayon nga verification sa kwestyunable nga billing kag pag-adjust kon may sala;
• pagreformat sang electric bill;
• paglakip sa bill sang masunod nga meter reading date;
• paghatag sang text kag call hotline para sa reading verification; kag
• partial implementation sang advanced metering infrastructure program ukon AMI-P ukon ginatawag man nga smart meter

Lakip sa medium-term solutions ang paghatag sang web portal para sa mga customers kag implementasyon sang batch 1 sang smart meters sa lima ka libo ka customers. Samtang long term solution naman ang full implementation sang smart meters. (AGB)