Mga nakamaskara nga lalaki, nasiplatan sa Lambunao!

Lambunao, Iloilo–Napuhag ang mga residente sa Lambunao sang nasiplatan ang duha ka nakamaskara nga lalaki nga nagsakay sa depasahero nga jeep sa banwa kag nagpanaug sa Barangay Caninguan kaina sang udto.

Suno kay Walang Punong Barangay Antonino Perez, nagreport ang driver kag konduktor sang jeep nga nagaduda sila sa duha ka pasahero gani nagtawag sila gilayon sa mga otoridad nga nagresponder sa area pero wala na sang naabtan.

Ginsaysay naman sang konduktor nga si Albert Encino nga nagsakay sa atubang sang WVSU Lambunao campus ang duha ka lalaki nga nakasuksok sang maskara nga itom, tshirt kag dilargo nga itom kag may bitbit nga mabug-at nga bag. Kumpiyansa si Encino kag iya driver nga si Dodo Osorio nga pangayaw ang mga ginadudahan nga pasahero. Karay-a speaking ang duha suno pa sa konduktor.

‘Hoax’

Wala naman sang kamatuoran nga may gin-hostage nga mga estudyante sa Caninguan. Pag-athag ni Dr. Rosario Lego, principal sang Caninguan Elementary School, ginsuspender nila ang klase kaina bangud ginsugat sang mga ginikanan ang ila kabataan sang nabatian ang impormasyon nga may nakita nga makaduluda nga tawo. Apang indi matuod nga may linupok, may nagsulod nga armado sa eskwelahan ukon may hostage nga natabu suno sa principal.

Gintawag naman ni Lambunao Mayor Jason Gonzales ang report nga may hostage nga hoax ukon indi matuod nga balita. Nagpangabay siya nga indi na pag-ipalapta ang sala nga balita pero wala sang malain kon mag-alerto ang pumuluyo.

Samtang ginpasiguro ni PCINSP Jogen Suegay, OIC sang Lambunao Police Station, nga padayon ang ila pagpangita sa makaduluda nga mga tawo. Naka-alerto ang bug-os nga pwersa sang mga pulis suno pa kay Suegay. (AGB)