Mga transport groups sa probinsya, magapabilin sa Tagbak Terminal samtang wala pa nadesisyunan sang City Council kon i-renew ang franchise sang terminal

Iloilo City–Ginpakamaayo sang mga transport groups sa probinsya nga hulaton ang resulta sang regular session sang City Council buwas sa diin pagadesisyunan ang renewal sa franchise sang Tagbak Terminal.

Reaksyon ni Confederation of Iloilo Provincial Jeepney Owners and Drivers Association (CIPJODA) President Porsing Parreño sa pahayag ni Mayor Jed Patrick Mabilog nga hulaton ang Martes nga ma-aprubahan ang franchise sang Tagbak Terminal. Nagpanindugan si Parreño nga indi sila magresgo sa pagsulod sa Vallacar Transit Terminal ukon sa Joroshely Terminal agud indi madakpan sa out-of-route nga violation.

Para kay Parreño, indi ma-athag ang negosasyon sa tunga sang Vallacar Transit Incorporated kag ni Mayor Mabilog bangud wala man sila ginpa-intra sa pag-istoryahanay.

Kon indi gihapon ma-aprubahan suno sa iya ang renewal of franchise sang Tagbak Terminal, madangup kay Governor Arthur Defensor ang mga transport groups sa probinsya. (Aine Grace Bravo)