MIWD Board, indi pwede mapahalin suno kay Gov. Arthur Defensor

Iloilo City–Nagapati si Governor Arthur Defensor nga indi puwede pahalinon ang mga miembro sang board sang Metro Iloilo Water District ukon MIWD.

Suno sa gobernador, wala pa siya nakabasa sa Supreme Court decision sa Metropolitan Cebu Water Ddistrict case nga nagdeklarar nga unconstitutional ang section 3 paragraph B sang Presidential Decree 198 nga nagatumod sa appointing authority pero nagapati siya nga indi puwede pahalinon ang present board bangud maapektuhan sini ang tanan nga water districts sa Pilipinas. Ang pag-appoint  sa mga directors suno kay Defensor nasantu sa desisyon sang korte sadto kag nagpungko ang mga ini antes pa man nakagguwa ang desisyon sang Korte Suprema sa Cebu case.

Dapat suno kay Defensor nga respetuhon ang appointment sang current MIWD board. Ginkwestyon man sang gobernador kun ano ang matabu sa mga transaksyon nga ginsudlan sang board kun ideklarar nga void ang ila appointment.

Sang damlag lang, nagpadala si Mayor Joe Espinosa sang cease and desist notice sa MIWD directors batok sa pagperform sang ila functions. (AGB)