‘Na-trauma’

Iloilo City — (UPDATE)  Na-trauma ang 16-anyos nga dalagita nga ginkalbo kag ginkiskisan kilay sang iya amay.

Suno kay Beth Seville, head sang Crisis Intervention Unit sang City Social Welfare and Development (CSWD), desidido si alyas Inday nga magpasaka sang kaso sa iya amay nga si alyas Dong bangud sang natabu.

Ginpahayag ni Seville nga bisan ngalan sang amay ang indi luyag nga mitlangon ni Inday bangud sang kahadlok.

Magluwas sa physical kag emotional effects, may yara man sang psychological effect ang natabu kay Inday bangud nagahambal ini nga indi na magpakita sa iya amay.

Ginpahayag ni Inday nga natak-an na siya mag-eskuwela bangud nga tuman ka istrikto sang iya nga amay.

Suno kay Seville, wala ginapasugtan ang dalagita nga maglagaw kag dapat balay kag eskuwelahan lang ang iya nga kadtuan.

Nagpasalig naman ang CSWD nga suportahan ang menor de edad tubtub mangin handa ini nga magbalik sa iya pamilya.

“Nadala sang kaakig”

Nadala sang iya kaakig ang trisikad driver nga si alyas Dong sang lapaz gani nga ginkalbo kag ginkiskisan sang kilay ang iya 16 anyos nga bata nga babaye nga si alys Inday.

Suno kay Dong, na-impito siya bangud nga masami naga-absent sa klase si Inday, naga-upod sa barkada kag nagalayas kon akigan.

Pebrero 20 sang gin-akigan ni Dong si Inday bangud wala gilayon nagpauli bisan wala na sang klase.

Pebrero 21 sang naghambal si Inday nga malayas pero nakita siya sang iya amay gani nga ginpapuli, ginguntingan ang buhok kag gin-shave ang kilay.

Gin-ako ni Dong nga tuyo niya pa kuntani gapuson si Inday bangud sa sobra nga kaakig.

Kahapon, ginpatulog lang ni Inday ang iya amay antes nag-upod sa nagsugat sa iya nga ginapatihan sang iya iloy nga iya migo.

Ginpabutyag ni Dong nga pirme niya ginalaygayan si Inday nga mag-eskwela sang maayo agud indi magsunod sa iya nga grade 5 lang ang tinapusan pero wala gid nagapamati.

Gindakup sang mga pulis si Dong kagab-i.

Suno naman sa asawa ni Dong nga si Teray, wala man sila nagkulang sa paglaygay kay Inday pero wala gid nagapamati. (JoMaque)