Palaro Update: Mangin spectacular ang Opening Ceremony—Antique Gov. Rhodora Cadiao

Antique–Mangin spectacular ang opening sang Palarong Pambansa sa Dominggo, Abril 23.

Magapasundayag ang bag-o nga mga fighter jets sang Philippine Air Force bilang pagsaludo sa guest of honor sa hinampang nga si Presidente Rodrigo Duterte. Makita man ang paglupad sang mga Army skydivers sa ila aerial display sang synchronized acrobatic formations.

Magluwas dire, ginpasiguro man ni Antique Governor Rhodora Cadiao nga madamo pa nga mga sorpresa ang masaksihan sa opening. Ang most decorated long jumper sang Pilipinas nga si Elma Muros ang magabitbit sang torch kag ang bugal sang Antique nga si tennis national champion Marian Capadocia ang magasindi sang cauldron.

Suno kay Cadiao, makita ang blend sang dumaan nga kultura kag magic sang bag-o nga teknolohiya agud mahatag ang “the best” nga lalantawon sa pagbukas sang hinampang. Samtang, ginpahayag ni Cadiao nga dulaun na ang malawig kag makapoy nga snake parade sa Palaro nga nasaksihan sa nakaligad nga mga tinuig sa baylo makita ang convergence dance parade sa diin ang 18 ka mga regional delegations, magahalin sa nagkalain-lain nga direksyon sang bag-o ginkay-o nga Binirayan Sports Complex kag magatipon para sa bongga nga opening extravaganza nga updan sang “Tatusan Tribe” halin sa Caluya. Masaksihan man ang performance sang award-winning local musician kag composer nga si Dante Beriong, ang grand champion sang 1998 Philippine Centennial Celebration. Ambahon sini ang original composition nga gingamit nga theme song sa Palaro nga may tig-ulo “Solidarity Song.”

7,000 ka mga atleta ang maga-agaway para sa 925 ka gold medals nga nakataya sa 24 ka events. (AGB)