Panday nga nagtiro patay kay SPO1 Sherwin Arondain sa Dumangas, ginpasakaan na sang kaso

Iloilo City — (UPDATE) Ginpasakaan na sang kaso nga murder si Rolly Lete alyas Batik, 42, sang Tubungan, Barotac Nuevo, nga una na nag-ako nga siya ang nagtiro patay kay SPO1 Sherwin Arondain sa PD Monfort North, Dumangas sang Mayo 20.

Ginkonfirmar ni Chief Inspector Rene Obregon, hepe sang Dumangas Police Station nga gin-file ang kaso sa Iloilo Provincial Prosecutors Office kaina sang aga.

Una na ginpabutyag ni Lete nga naakig siya sang nabungguan siya sang motorsiklo sang biktima.  Ginpahayag sini nga matapos ang pagbunggo sa iya, ginturasok pa siya kag ginhangkat sang away sang police kabangdanan iya gintiro.

Sa pinakaulihi nga imbestigasyon sang dumangas police station, ginpahayag ni Obregon nga si Lete lang ang suspetsado sa krimen bangud ang duha ka tawo nga ginkabig nga persons of interest, nahibaluan nga mga abyan ni SPO1 Arondain kag wala sang koneksyon sa krimen.(JoMaque)