Pasahero nga babaye sa Iloilo airport, nagreklamo matapos nakuhaan sang duha ka bala ang bag sang iya utod
Iloilo City — Nakibot si Mrs. Azucena matapos nakuhaan sang duha ka bala ang bag sang iya utod nga bag-o lang gin-operahan sang naglabay sila sa Iloilo Airport sang nagligad nga semana.
Ginsaysay ni Mrs. Azucena nga ginsugat niya ang iya utod nga babaye nga 39-anyos bangud gin-amputate kag iya dal-on sa ila sa Manila agud magpa-ayo. Naka-wheelchair ang iya utod sang nagsulod sa paluparan.
Sang naglabay sa x-ray machine ang ila bag, gindala sila sa higad kag liwat nga ginpabutang ang ila bag sa x-ray machine. Sa ikatatlo nga tiun suno kay Mrs. Azucena, ginpalapitan na gid sila sang empleyada sang airport. Ang empleyada suno sa iya ang nagbitbit sang bag sang iya utod, nagbutang sa x-ray machine kag nagkuot sa side pocket nga una na ginkuhaan sang iya utod sang rosary. Nakuha sa side pocket ang duha ka bala.
Gindala sa Airport police ang mag-utod kag ginpa-athag ni Mrs. Azucena nga nagpadulong lang siya sa Iloilo agud magsugat sa iya nagabalatian nga utod. Wala man suno sa iya sang rason agud magdala sang bala ang iya utod.
Gin-confiscate sang Airport police ang mga bala kag ginpasugtan man ang duha nga makabiyahe. Suno kay Mrs. Azucena, ginhambalan sila nga hipsan na lang ang natabu bangud wala man sila gin-detain. Pero ginpa-delete suno sa iya sang pulis nga iya nakilala kay Sara Palomo ang post sang iya utod sa Facebook tuhoy sa natabu kag nagpasugot man sila agud indi mahuy-an ang Airport.
Naga-ayo lang si Mrs. Azucena sa mga otoridad nga i-check ang CCTV footages agud ma-clear sila bangud nagalingin ang ulo sang ila pamilya kon ngaa may bala sa bag sang iya utod. Mas maayo suno sa iya nga maka-check ang Airport police agud indi matabu sa iban nga pasahero ang natabu sa ila.
Gintawgan sang Aksyon Radyo ang Airport police agud makuhaan sang side si Palomo apang wala ini sang duty suno sa nakasabat sa telepono. (JoMaque)