Pasahero sang RoRo vessel, patay matapos naglumpat halin sa barko sa Dumangas port

Iloilo — Ginapatihan nga gin-abot sang nerbyos ang pasahero sang roro vessel nga naglumpat halin sa barko nga pahalin sa Dumangas port kaina sang kaagahon nga nagresulta sa iya kamatayon.

Suno kay PO3 Kim John Banson sang Dumangas Police Station, pila ka metro pa lang nga naglakat ang roro vessel sang gulpi naglumpat si John Rey Buenaflor, 25-anyos sang Tabugon, Kabankalan City, Negros Occidental.

Isa ka oras ini nga ginpangita antes nasapwan nga nagasabod sa kalat kag gindala sa ospital sa banwa pero wala gid natabangan.

Ginpahayag nga ginsugat sang iya amay si Buenaflor sa balay sang iya tiyo sa Oton bangud nga indi na maayo ang mga hulag. (JoMaque)