Pila ka mga driver sang depasahero nga salakyan, wala nagsunod sa pagnubo sang pletehan

Pila ka mga driver sang depasahero nga salakyan, wala nagsunod sa pagnubo sang pletehan
12596503_181925975504589_449615674_n
Photo by Aksyon Kikik Enar

Iloilo City — May drivers nga salawayon kag wala nagsunod sa pagnubo sang pletehan sa depasahero nga mga jeep sa syudad.

Suno sa pasahero nga senior citizen halin sa Sambag Jaro kag padulong sa esplanade sa Diversion Road, 7 pesos man ang ginkuha sa iya imbes nga 5 ka pesos.

Wala na ini nagreklamo agud nga wala sang gamo.

Suno naman sa driver nga si Elmo Alimania sang Leganes PUJ, wala pa siya sang gina-uyatan nga taripa gani wala pa nagpatuman sang fare reduction bisan nag-epekto na subong nga adlaw.

Kon may salawayon nga driver, may mga nagpatuman naman sang order sang LTFRB 6 bisan wala pa nakakuha sang tarifa..

Suno kay alyas Charlie nga nagabiyahe sang Baluarte PUJ, nagpreparar gid siya sang sinsilyuhon agud indi na maka-bais ang pasahero.

Sa bag-o nga pletehan, 6 pesos kag 50 sentimos na lang ang plete sa regular nga pasahero kag 5 ka pesos sa mga estudyante, senior citizens kag persons with disabilities.

“Penalty”

Gin-engganyo ni Land Transportation Franchising and Regulatory Board (LTFRB 6) Director Romulo Bernardes ang mga pasahero nga mag-file sang reklamo sa ila opisina batuk sa driver sang depasahero nga jeep nga wala nagpatuman sang pagnubo sa pletehan nga nag-epekto subong nga adlaw.

Ginlaygayan ni Bernardes ang pasahero nga may reklamo nga kuhaon ang plate number kag idangup sa ila opisina.

Nagpa-andam si bernardes sa jeepney operator nga mamultahan kon mapamatud-an nga naga-overcharge ang iya driver.

Sa first offence, P5,000 ang penalty; P10,000 kag isa ka bulan nga suspension sang franchise sa second offence kag P15,000 kag kanselasyon sang frankisa sa ikatatlo nag offence.

Naga-isyu na ang LTFRB 6 sang certification sa mga transport groups agud mapatapik ang kopya sang bag-o nga pamasahe sa parte sang jeep nga makita sang mga pasahero.(JoMaque)

 

Archives, Gallery, News

Related posts

Leave a Comment