Pulis nga nagbilin sang patrol car sa alagyan sang firetrucks nga nagresponder sa sunog sa Jaro, nagpa-athag na

Iloilo City–Napatawag kag napangayuan na sang paathag ang pulis nga driver sang patrol car nga ginbilin sa alagyan rason nga nasagairan sang firetruck nga nagresponder sa sunog sa Barangay Benedicto, Jaro sang Sabado.

Suno kay Senior Inspector Tranquilino Querubin, hepe sang Jaro Police Station, gin-ako ni PO1 Charlie Peregil nga ginbayaan nila ang patrol agud magbulig sa pag-kontrol sang mga tawo nga nagapang-usyoso sa sunog. Ginrason man sang pulis nga nagabulig man sila sa pagbantay sa mga posible magpamintaha sa sitwasyon.

Detailed sa substation sang Jaro Police Station sa Barangay Balantangm Jaro si PO1 Peregil.

Sa video nga ginpost sa social media, makita nga ginbululigan sang mga residente nga mapahigad ang patrol car bangud nagasablag sa alagyan sang mga firetrucks. (AGB)