SOPA ni Gov. Arthur Defensor

Iloilo–Gin-isa-isa ni Governor Arthur Defensor ang mga achievements sang iya administrasyon sa iya State of the Province Address sa SP Session Hall kaina sang hapon.

Sa pagsugod pa lang sang speech, ginpabugal ni Defensor ang pagkilala sang DILG sa probinsya nga Best Performing Province in Western Visayas in the Excellence in Local Governance Awards halin 2014 tubtob 2016. Ang awards suno kay Defensor, nagapakita sang maayo nga performance sang probinsya sa panggobyerno. Ginkilala man sang DILG ang pag-uphold sang probinsya sa standard sang transparency, integridad kag service delivery paaagi sa gin-award sang DILG sang Seal of Good Local Governance sang 2015 tubtob subong nga tuig. Bangud sa mga pasidungog, nakabaton suno sa gobernador ang probinsya sang Performance Challenge Fund nga gingamit sa pagpakay-o sang dalanon kag iban pa nga mga programa.

Ginhatagan pagtamud man ni Defensor ang programa sang probinsya nga Iskolar sang Iloilo nga nagatuyo sa pagbulig sa pigado pero maalam nga estudyante. Ginpasidunggan sang gobernador ang 64 ka scholars nga nagradwar sa idalum sang programa kag nagpangibabaw sa ila field pareho kay Jomel Limbago sang San Enrique nga nagradwar sa ISCOF-Barotac Nuevo kag Rank Number 4 sa Fisheries Technologist Board Examination.

Nagbulig man suno kay Defensor ang probinsya sa agricultura kag mga programa sa environment pareho sa pagpa-untat sang issuance sang bag-o nga quarry permits sa lima ka dalagku nga suba agud malikawan ang peligro. Nagpabutyag man si Defensor sang suporta sang probinsya sa Philippine National Police paagi sa pondo kag equipment. Ginpasalamatan sang gobernador ang suporta sang SP kag mga pumuluyo para sa padayon nga pag-uswag sang probinsya. (AGB)