Suspek sa pagtiro patay sa lalaki sa motel sa Lapaz, ginhingadlan sang mga pulis!

Lapaz, Iloilo City–Ginhingadlan ni Sr/Insp. Edgar Anonoy, hepe sang Lapaz Police Station, ang isa sa duha ka suspek sang pagtiro patay kay Rogelio Amil sang Ticud, Lapaz sa compound sang The Q Drive-in Mote.

Suno kay Anonoy, ginkilala sang tatlo ka testigo ang gunman kay Hamza Pechon Kayani paagi sa litrato nga ginkuha sa social media. Ginkilala naman ang babaye nga kaupod sang biktima nga si Rogelio Amil kay Lovely Mae Provido sang Pavia. Ginpahayag nga na-identify ang salakyan paagi sa kuha sang CCTV camera sa isa ka barangay sa Lapaz.

Wala Nakakilala

Ginpanghiwala naman Kayani nga siya ang nagtiro-patay kay Amil sang  Setyembre 13  bangud nga naka-out-of-town siya. Suno kay Kayani, indi niya kilala ang biktima kag si Provido.

Wala sang rason suno sa iya nga makilala niya ang babaye bangud may bata siya kag may gina-upod subong nga lain nga babaye. Bisan suno sa iya pamangkuton ang pamilya ukon kaabyanan sang biktima kag ni Provido, duda si Kayani kon kilala siya sang mga ini.

Gin-ako naman sini nga nabilin ang isa niya ka salakyan sa syudad gani gusto niya mahibaluan kon sin-o ang nagamit kag kon ano gid ang natabu.

Posible Nga Himbonanay

May posibilidad nga naghimbonanay ang mga suspek kag ang babaye agud patyon si Amil suno kay Sr/Insp. Anonoy. Makatingalahan suno sa hepe nga wala nadalahig ang babaye sa krimen kag sa baylo, gindala pa ini sang mga suspek sa ila nga pagpalagyo.

Natalana nga pasakaan sang kaso nga murder sanday Kayani, Provido kag ang isa pa ka wala nakilala nga suspek. (Aine Grace Bravo)