Syudad sang Iloilo, ginpa-ipaidalum sa State of Water Calamity bangud sa El Niño Phenomenon

Iloilo City — Gin-aprobahan sang city council ang resolution nga nagapaidalum sa syudad sa state of water calamity.

Ginpahayag ni Councilor Love-Love Baronda, author sang resolution, nga 3 ka milyon ka pesos ang gamiton nga budget para sa pag-deliver sang tubig sa mga barangay nga nahubas ang mga bubon bangud sa epekto sang el niño phenomenon ukon malawig nga tig-ilinit.

Gindeklarar nga ipaidalum sa state of water calamity ang syudad suno kay Baronda base sa assessment sang City Disaster Risk Reduction Management Council (CDRRMC).

Una nga ginduso ni Baronda nga ipaidalum sa state of calamity ang syudad apang ginkuwestyun ini ni Councilor Plaridel Nava.

Ginrason ni Nava nga nagpasar sang resolution si Baronda nga wala makuha ang data ukon record sang mga barangay nga nahalitan sang el niño.

Suno sa konsehal, nagalapas ini sa laye bangud wala sang basehan ang amo nga deklarasyon.

Bisan ang probinsya suno sa iya ang wala nagdeklarar sang state of calamity bisan pa nga kompleto ang listahan sang kabanwahanan nga nahalitan sang el niño.

Nagapakuno-kuno suno kay Nava ang iya mga kaupod sa konseho nga expert apang wala man sang basehan sa pagdeklarar nga ipaidalum sa state of calamity ang syudad.  (JoMaque)

Archives, Gallery, News

Related posts

Leave a Comment