Turismo sa Bucari Leon, apektado sang encounter sa Barangay Lampaya

Leon, Iloilo–Apektado ang turismo sa Bucari kasunod sang encounter sa Barangay Lampaya sang Lunes. Suno kay Evan Calaor, Camp Manager sa Bucari Campsite, 95% ang ginubo sang tourist arrivals sa lugar bangud sang natabu.

Kun normal nga adlaw suno kay Calaor, nagalab-ot sa 80 ang mga bisita nga nagakadtu sa campsite apang nagnubo sa tatlo kahapon kag wala na gid sang may nagbisita kaina sang aga.

Nagalaum si Calaor nga magbalik sa normal ang turismo sa tion nga matapos na ang clearing operations sang Philippine Army kag masiguro nga safe para sa mga bisita ang Bucari. (AGB)