Una nga adlaw sang pag-file sang Certificate of Candidacy para sa mga mapadalagan sa 2016 elections, nangin matawhay!

Una nga adlaw sang pag-file sang Certificate of Candidacy para sa mga mapadalagan sa 2016 elections, nangin matawhay!

HiResIloilo City — Matawhay pa ang una nga adlaw sang filing sang certificates of candidacy (COCs) para sa mga luyag magpadalagan sa 2016 elections kaina sang aga.

Sa City Comelec, una gid nga nag-file sang COC sa pagka-konsehal si Councilor Joshua Alim sa idalum sang United Nationalist Alliance.

Gin-ako ni Alim nga may instruction halin kay Vice President Jejomar Binay nga dapat una nga mag-file sang COC ang mga UNA candidates.

Apang may lain man nga plano suno sa iya ang iban nga miembro sang partido.

Ginpabutyag ni Councilor Plaridel Nava nga maga-file siya sang COC sa pagka-konsehal sa huwebes upod sa iban pa nga kandidato sang UNA.

Magluwas kay Alim, nagfile man sang COC sa pagka-konsehal si Doktora Candice Tupas sang Liberal Party (LP) kag Mr. Rommel Ynion bilang independent candidate.

Ginpasiguro naman ni City Comelec Officer Atty. Rainier Layson nga preparado ang iya mga empleyado kon magdinaguso na gid man ang mga maga-file sang COC.

Suno naman kay Layson, ginarespeto man sini ang panimad-on sang kada kandidato apang ginadumili ang pagpasulod sa Comelec Office sang mga magahud nga supporters.

Sa Provincial Comelec Office naman sa La Granja La Paz, wala pa sang nag-file nga kandidato sa pagka-gobernador, bise gobernador, board members kag kongresista sa lima ka distrito. (JoMaque)

Archives, Gallery, News

Related posts

Leave a Comment