Update: Akusasyon sang NPA nga may napatay nga suldado sa ila engkuwentro sa Tapaz Capiz, ginpanghiwala sang Phil. Army

Iloilo City — Indi mahimo nga taguon sang Philippine Army kon may miembro ini nga napilasan ukon napatay sa engkuwentro.

Reaksyon ini ni Lt. Col. Ray Tiongson, spokesperson sang 3rd Infantry Division sang PA sa pahayag sang Jose Percival Estocada, Jr Command Central Panay nga isa ka tropa sang 61st IB ang napatay sa engkuwentro batuk sa mga rebelde sa Barangay Lahug, Tapaz, Capiz Domingo sang aga.

Kon may napatay ukon napilasan nga suldado suno kay Tiongson, dapat ini nga mabal-an sang iya pamilya.

Suno pa kay Tiongson, kon may napilasan nga suldado, naka-standby man ang medical team sang Philippine Army agud bulngon ukon dal-on sa ospital.

Posible nga may napilasan sa mga rebelde kag ginahulat pa ang komfirmasyon halin sa mga pumuluyo sa Brgy. Lahug.

Wala man sang kamatuoran suno sa iya ang ginapasibangud sang NPA nga may napilasan nga suldado sang gin-harass ang tropa sa Barangay. Katipunan, Tapaz sang Pebrero 20 sang gab-i. (JoMaque)