UPDATE: Kaso sang Dengue sa Syudad, Nagsaka sang 80% sa Una nga Walo ka Bulan sang 2016

Iloilo City–Nagtimbuok ang kaso sang dengue sa syudad sa una nga walo ka bulan sang 2016.

Sa record sang City Health Office, tatlo ang napatay kag 80 porsyento ang ginsaka sang kaso sang dengue halin Enero tubtob Agosto subong nga tuig. Suno kay Dr. Mae Delmo, Assistant City Health Officer, nagmandu na sila sang fumigation sa 10 ka barangay nga may pinakamadamo nga kaso sang dengue.

Base sa record, napatay ang anum ka tuig nga bata sa Ingore, Lapaz sang Agosto 14; 11 ka tuig nga bata sa Alta Tierra Village sa Quintin Salas, Jaro sang Agosto 19 kag isa ka tuig nga bata sa Calumpang, Molo sang Agosto 25.

Katinlo sang palibot kag kooperasyon sang kada isa suno kay Delmo ang mga paagi agud mahagan-hagan ang dengue. Nagsaka ang kaso sang dengue sa 708 sang Enero tubtob Agosto subong nga tuig halin sa 305 nga record sa pareho nga period sang nagligad nga tuig. (AGB)